Maraland News

Thursday, Jul 31st

Last updateWed, 30 Jul 2014 10am

MARALAND

MARALAND NEWS

MADC DAY 2014 BIETANA HNEI

Maraland News (Siaha) : Atanoh he MADC aduana ei-42 na châ ta, Alyna Programme deikua pachhuahpanohpa châ leipa ta,MADC Office deikua pahanoh(Chhuti) ta phuahpa a châ.

MADC Main Office
       He noh châna heta Puhpa V.Zacho, Executive Secretary, MADC ta zawpizy hnota Council Day bietana reih ta, India râh hropa liata chyhsa maluh 500000 hlei ama châna liazy Council biehneina he piepa châ ei ta, keimo deikua cha eima maluh chyh kaw hra sala Khazohpa ngiachhiena vâta Council he hnei pita, he biehneina reihrahpa vâta atahma duahmo liata eima dua theipa eima châ tahpa reih ta, eima râh hmasie via nawpa liata thyutliapazy ta ku hriahriana kyh liata tiama papua via rili awpa eimâ ngia tahpa chhao a reih. Eima hmiala daihti eima sie awpa liata zawpi zydua paloraoh kawpa ta ti nata rah châta tiama papua chyu awpa apeimawh zie zawpizy hnota pasyuna bie tana a hnei.

Rev.Maiki (Râhchhitunô) Indonisia Atlyh Awh

sayamaMaiki

Maraland News (Yangon): Târi noh 28, Pachawh(April), 2014 ta Rev.Maiki (Râhchhitu Nô) cha, Indonesia râh atly aw. Ano khitly na nahta âzaopa kyh he UK râh tawhta pauduapa Awnano pa py “Inspired Individual Program” & “Tear Fund” member zy ahmô pakhyna a châ. UK nôpawpa zy tawhta “Inspired Individual Program” & “Tear fund” py ama vaw padua chhâ na pa he aleichô chariah adyuhpi na ei-2 na khai tawhta mochao, byhsypa zy ama vaw hlu tu haw bapa vâta cha nawhzy kyhpacha pa ta ama vaw paduapa PY a châ. “Inspire Individual Program (IIP)” nôpaw zy ta PY ama vaw paduapa he chyhsa thlah aplôhthai awpa, chyhsa tha apathyuthai awhpa nata ngiapâ na kyh liata ngachhihpa zy deita a tly patloh tyh eita râhkha tawhta pakha deita member châ theipa a châ. He Py liata Dr SaSa chhao he 2009-1012 term châ taita Myanmar country Marasaw tawhta atly patloh na liata a vaw hlao thei hra pa a châ. IIP member zy ama term a chhâ hla liata ama râh liata ama ngahpa chyhsa pakha nominate thei na power ama hnei chyu. Chavâta Dr.SaSa chhao he a term (2009-2012) a chhâ ba awhpa vâta ano vyu pata member angahpa Myanmar country vyupa Marasaw tawhta Rev.Maiki he nominate vaw tao ta a vaw recommend hra.

Dr.SaSa Chapi khih liata a y nota IIP & TF Director pa cha vaw tlo ta, cha nota Rev.Maiki he Interview tao ta IIP member liata ama vaw la pangia hawpa a cha. Rev. Maiki he 2012-2015 term tai ta a vaw hria aw. IIP member zy atyhpakhyna 2012 (Armenia) , 2013 (London) nata 2014 kô thaona Bombay khihpi zy liata committee vaw hrua tyh taraw eita Mara râh chata arai hria tymâ na vâta râh-3 pe’nawhzy cha tlo thei tyh leipa ta atahma la, 2014 Indonesia liata ama tao awhpa he ano chata eikha na IIP member zy hryta â hlao n’awpa a cha. “Inspire Individual Member-IIP” nawh he aleicho liata Râh-68 /country vyutuapa member 68 zy ama châ.

Atahma Indonisia liata “Inspire Individual Program” & “Tear Fund” family zy âma hmô pakhy awhpa he noh-10 chho daiti ahmapa châ aw ta, Member-68 (Râh-68) pe’nawh he khei hawh ta ngiapâ na kyh liata tha ama patlo thei aw, chanô nah zy he kheita e tha ama patlo thei aw, hara-nohmei zy nata community development zy he khei hawh ta ma, ama râh chyuta rai ama hria thei aw tahpa kyh reipahmao aw eita IIP member zy ama râh chyu liata ama rai hria chakaohaipa zydua mo pakha hnoh pakha reina (report na) hnei chyu aw eita rai ama hria pazi lyma awh tahpa a cha. Rev. Maiki, Inspire Individual Program & Tear Fund member chhao he 1012-2015 term a chhâ chei ta Myanmar chyhsa vyu pata angahpa chyhsa pakha nominate tao awta a recommend thei hei hra aw.

Rev. Maiki he Pachawh, 28,2014 (Hriatuanoh), Myanmar time 10:00 AM ta Yangon Airport tawhta athao aw ta Patô (May), 7, 2014 ta Yangon khihpi â vaw ngia hei aw. Rev.Maiki Mara râh châta arai hria lai n’awpa kyh liata hlaotloh sala, thlahchha bao chyu suh vy.            

<by - Fc.Vatlo>

Democratic Leadership Training Delhi khihpi liata taopa acha

Maraland News (Delhi): 25.07.2014 noh Delhi Mara Community (DMC) chhihthana ry liata Delhi liata a pahrâpa Marasawzy eimâ chhihthana liata tha miah a patlo awpa nata hmasiena achâ awpa, tahpa beiseina laingaitapa hnei pa vata Democratic Leadership Training (DLT) cha Mara Christian Fellowship (Church) liata hlao tloh kaw pata tao theipa acha a haw.

He Workshop tao awpa he Burma Center Prague (BCP) tawhta baona (sponsor) hmopa châta, He miah a ma bao theina, amâ pie pasaina chô liata (Delhi Mara Community) ta alyna bie eima hmeiseipa a cha.

DLT Workshop liata Marasaw tawta patopatiapa a châpa raw ta, Marasaw hlei kho ta eima unaw sahlaozy achâpa Lautu, Zophei, Zotung zy chhao a eihpa ta hruana hneipa châ hrat a, Chin Students’ Union (CSU) chhao hrua hrapa ta a cha. He liata akia awpa chysa maluh (45) thlie (Limit) cheihpa a châpa vata atlypa ta maluh(45) tlai ta aki kawpa ta kiapa ta Workshop chhao hlaotloh kawpa ta siekheipa ta a cha. Eima workshop Democratic Leadership Training he speaker pa(4) hruapa ta ama cha.

Hruapazy,

1. Dr. Tint Swe (Ex MP, NLD), 2. Rev. Dr. Peter Beichatlai, 3. Ms. Rosalinn Zahau (Tialte) nata St Râhchi Choza zy ama cha.

Pachuna tlâhpi viapa thokhazy,

1. Dr. Tint Swe (Ex MP, NLD) châta ano he Yamuna Clinic tahpa thohna o pahy ta eima rah chysa y ta thata ama ngaina suh a cha hra. A no heta “ Eima Chheipâ Hrihsiana” (Community Health Awareness) tahpa bie tlâh hmâ pata nohto eima khihsa na liata a peimawpa hrihsiana lâ chhâh ta miah a pachu. He miah a pachu na liata no chareih eima khihsana liata hri-iah miah a vei thei chaipa (1) Huso na lâ chhâh ta eima pasa khei tyhpa (2). Chhoh pasana, eima hmoniepazy vata hri-iah vei tyhpa (3). Thisai a hnaipa nata a hropa thazeina hri-iah (4). Nawhphao-hawsai pina lâchhâh ta a zaopa hri-iah pasa na (5) chano chapaw a patlah na tawhta vei theipa hri-iah zy bie tlahpi taw pata a reipa acha. 

2. Chakhai tawhta Rev. Dr. Peter Beichatlai, Beita ta “Chhihtha tuhpa a peimawh zie: a chu laih awpa nata hmialâ daihti nota chhihtha tuhpa a peimawh zie” (The Importance of Leadership: The Trends and Scope of Leadership in the Future)zy miah pachu ta, Khizaw chyhsa chhihtha tuh pe’nawh ama yzie/nochâ nata khizaw rah a bua haipazy mo pazihpa pata chhihtha tuhpa pakha ta hmo tao lai awpa zy ta pachuna hneipa acha. He reina liata chhihtha tuh pakha ta a hnei awpa hmo peimawhpazy bietlâh sa(9) taw pata pachuna hneipa acha. He liata sakha a reipa cha “tanoh ta degree hmo ta a mylâ ta a chu khao lei khia cha, hahnoh cha châ a thaileipa ama châ haw” tahpa bieso zy hmâpata Chhihtha tuh duasu peimaw zie reipa acha. Rev. Dr. Peter Beita he Immanuel Community Church liata Pastor rai achakao nga haipa acha.

2. Ms. Rosalinn Zahau (Tialte) tawhta “Chano zy ta chhihtha tuhpa dua su liata ahlaothei lai n’awpa a peimawhzi” (The Need for Women Participation in Leadership Roles) tahpa bietlapi hmâ pata reipa a cha. Burma rah chhoh malu zydua 53 lakhs (53 million by world population review) chho liata chano zy he a khophi cha eita he chhoh liata chhitha tuh laipa ama hmo thei leina, chano nawh cho liata hriena ama ty pa, chahleikho ta Chin chysa malu zydua he  5 lakhs châ eita he chhoh liata chano sawzy he a khophi kaw châ heih eita cha chhoh tawhta Parliament liata a to theipa chano saw tawhta MP pakha ngala yta a hropa chano chhihtha tuhpa achapa hmo awpa ama y leizi,  1889 lia na khata chanosaw 8 tawhta khotalai na (independence) British colony ama kaw dao laina, hlâ no ta chano sawzy chhihtha tuhpa duasu amâ kaw dua laihna,1997 ko liata Burma sawkha ta UN Convention sakha a châ hrapa “chano naw cho liata hriena, mo pahnaina nata pathluana y khao lei awpa” (Convention in the elimination of all forms of discrimination against Women) tahpa mosai roh ta a tanoh taih ta pheisai nawh ta chano patu-pakhi ama hmâ ngâ pazy, dah a zyh leizi pakho pâ pata chanozy duasu pasâ awpa zy, chano nata chapaw a lyu rairi kaw pata raihria chhihtha na liata a kho awpa. Mo pahnai khao lei awpa zy reipa a cha. Ms Tialte he Chin Human Rights Organization (CHRO), New Delhi liata field officer rai a chakao nga haipa a cha.

3. St Rachi Chozah (Papao) tawh ta “Châh-daihti a pathlai ngâ nota a chhih thana” (The Role of Leadership in Transitional Period) tahpa chotlapi taw pata reipa ta a châ. He a reina liata tahma ta eima Burma rah a si khei nga haipa peace negotiation and cease fire zy kaw mo pazi laih pata a rei hrapa acha. Eima Burma rah chhoh liata parliament hmotaopazy nata sawkha sie khei laihpa, 2008 dah phopizy mo pazih pata reipa a châ hra. Papao Rachi Chozah he Burma rah politic analysis a tao tyhpa a cha.

Bierei tuhpa (speaker) 4 zy heta asia kaw pata noh kha chho rei eita a kiah tuh pe’naw zy chhao thata paloh tlokhu apa pahâ hmeiseipa nata ama papha sa hmeisepa ta pahnopa a cha.

Chhihtha tuh pakha châta a peimawhpa zy cha, “Hrihsia aw ta, a noh a chana pahno hmeisei kaw pata, Chano zy mo pahnaina hneilei pata tovyuh a kho pa pie thei awta, Daihti-chah buabana a tyh no chhaota hmo yzi pathlua thai pata a chhih tha laih khiacha hlaotlona a hmo lyma aw” tahpa khochhi ngaitapa bietlâh pakyhna chhao ta pasai lei kawna cho ta daiti khawpa a cha.

 

Reported by: Chhi Chhi

NLD PARTY TAWHTA MARASAW POLITICS APATLA AWHPA AMA Y

Maraland News (Lelai-Thatla Township): Nochhi Mara Thatla Township tawhta Puhpâ C. Zacho (Tovau) cha kô 2015, Myanmar Election liata NLD party tawhta apatlah(pie) hra awhpa ta Pamieh (March) thla tawh na khata party ticket hmô thei n’awpata “Thatla township chho” Mara, Zaophi nata Lautu khi zy atly lymâ haw ba. NLD office he Thatla township chho Mara, Lautu nata Zaophei khito liata sokhai hawpa a châ.

                NLD ta kô 2015 Election angia awpata âchhuahnâ dahtlapi pa cha: Democracy hmôpapua thei n’awpa châ ta, Member of Parliament (MP) member a sawhkhâna lathei n’awpata 51% percentage a kho (over) thei khia President roreina tovyu la thei awhpa a châ. Constitution Article No (59-f ) “…Pihnô Suu Kyi president tovyu ahmô thei lei n’awpa dah…” ama parai thei lei aw’pa chhao ta MP 51% ama kho khia ta cha NLD ta president roreina ama la thei aw tahna a châ.

                Pyithu Hluttaw, Amyotha Hluttaw nata Pyidaungu Hluttaw zy he asiano kaw pata raina y ma leipata châhrasala “Thatla Township” he state châta No.(2) chho liata apahrâpa a châpa vâta No. (2) constancy sie dah hawhta a sie awhpa ama châ. Anodeidua No.(2) constancy hmô awhpa seat cha, state MP châta pakha/sakha (1), Myanmar center seat châta sakha (1) tahpata No (2) chho liata a vaw sie lai n’awpa a châ.

                NLD policy cha: Pihnô Suu Kyi he president tovyu ama pie/pielei kyh constitution No.(59-f) ama parai leipa chhao ta kô 2015 election liata NLD party he MP 51% percentage ama kho ha khia cha Democracy hmô thei n’awpa ta constitution by laws No. (59-f ) he ama vaw parai thei cheingei aw. Chahawhta hmala laipa ta NLD party ta hlatlohna a vaw hnei khia, NLD party tawhta chyhsa ngachhi chaipa pakha president biehneina tovyu a vaw latu thei n’awpa lâpi a y. Acho liata palasapa hawhta daiti ama vaw tlô thei khia ta cha 2008 constitution parai byuhpazy parai theina right ama hnei ba aw. Democracy hmô thei n’awpa lâthlôh a ypa beiseihna vâta NLD party he 2015 election angia awhpa ta hmalana a vaw hnei pathao haipa a cha.

                Democracy hmo tua leipata Federal system siekhei thaipa a châ leipa vâta Democracy rule ta Federal system asiekhei theipa NLD party ta hmalana a vaw hnei chhâna a châ.

Palewat nata Matupi township chho liata apahrapa Marasawzy party politics kyh liata ama ao-reih vaw pua mah lialeipa ta Thatla township, Marasaw tawhta Puhpâ C.Zacho (or) Tovau he NLD tawhta hma a vaw la haipa châ ta “party seat” ahmô thei n’awpata thlahchhâ bao chyu su vy.               

ECM ASSEMBLY RY LIATA MEDIA MINISTRY THIEHPA PADUAPA A CHÂ

Maraland News (Siaha) : ECM Assembly ry liata Media Ministry thiehpa cha paduapa châ ta, July 4,2014 nohchho dawh 1-pa Lorrain Hall liata Rev.Dr. FC. Beicho, Executive Secy,Education i/c Social Mission chhithana ry liata meeting ei-1na cha hneipa a châ. Hezy he meeting biepathlupa a châ;

Chairman(Right) & Secretary
1. Media Channel taopa châ mawh sy.
2. Holy Bible Audio pachhuahpanoh awpa.
3. Media Ministry he thatlô kawpa ta siekheipa a châ thei nawpa ta Evangelical Media Ministry moh ta raihria lymâpa châ mawh sy.
He EMM liana he khei hawpa Awnanopa chhao ahlao pasaipa châ aw ta, Khazohpa hla nata bie, chakaona liata thatlô kawpa ta siekheipa a châ thei nawpa ta hmalahpa châ mawh sy tahpa chhao bie pathlupa a châ hra.
Evangelical Media Ministry liana he Chairman châta Assembly ta Rev.Dr.FC.Beicho rao ta, Pihnô B.Zihlua cha Secretary ta raopa a châ.Executive member zy cha ;1. Rev.B. Beilua, Mc. KH. Beithie, Mc. K. Chhihrau, Mc. TA.Beihnia, Mc. H.Sabi, Mc H.Lalfakzuala nata Puhpa Lallungmuana Hrahu zy ama châ.
Source : DDK News, Siaha

Mawtlâh Bia Râh Kyh

Maraland News (Yangon): He râh liata avaw pahratuapa chyhsa zy he marasaw châ pita, Mawtlâh bia liata khih a ypa zy cha: (1) Mawtlâh, (2) Lôbô, (3) Saedaeh, (4) Saolôtlâh, (5) Thehratlâh, (6) Bâkalâtlâh nata (7) Samah chyhsa zy ama châ. .. sawhkhâ a vaw kia tawhta Rakhai underground (ALB) zy he vaw pua haw ba eita, CNF nahzy chhao Mawtlâh bia he âmâ vawh chhai tyh hra.

SIAHA LIATA AWNANOPAZY TA RÂH CHÂTA THLACHHANA HNEI

Maraland News(Siaha-Maraland): Zahnia June 30 noh kha India râh sawhkhâ nata Mawrâh MNF( Mizo National Front) zy ta kô 20 hlei ama ryh khao lei tawhta aryhna noh( June 30, 1986) tlona alyna Mawrâh chhoh zydua liata ahmapa a châ. He noh liana he ECM Revival & Evangelism pachhuahpanohpa ta Siaha liata Awnanopa nano nanopa zydua ta Siaha Tlyliah, Siaha Vaihpi liata râh châta thlachhana ama hnei.

Rah chata thlachhana, Siaha Tlyliah, Siaha
He daihti he Rev. Thylua Hlychho Director Revival & Evangelism , ECM Hqrs. chhithana ry liata ahmapa châ ta, Session 4 lâta pachhaihpa a châ. ECM Hqrs, Presbyterian Awnanopa, BCM Awnanopa, LIKBK nata Salvation Army Awnanopa tawhta Pastor zy ta Khazohpa bie reina chyupa daihti ama hmah chyu.
He daihti liana he mopakha, Awnanopa, khitlâh nata râh hmoparaona zy reipacheina nata molei aphuahna daihti hneipa a châ. India râh, Mizorâh nata MADC chhithatuhpazy châta thlachhana daihti chhao hneipa a châ hra. He daihti ahma awpa ta apuapa zawpi hlu ngâsâ ei ta, zala dawh 3:00 -pa taihta daihti ahmapa a châ.

ZZLMS- Akhaina (Rezua) liata Thatih chyupa

Maraland News (Maraland); Khazohpa ngiachhie zawzi vata ata ko ZZLMS Fellowship he Razua Town liata April 29th- May 2nd,2014 taihta tlahtlo kawpa ta hma theipa achapa vata Khazohpa hnohta ahmia tua ta eima vaw ly ngaita kaw.

USA Marasawzy ta 5th MCC Conference hnei haw

Paper present apie haipa Rev Dr Laiu FachhaiMaraland News (USA): Mara Community Committee (MCC) chhithana ta taotyhpa Mara Conference (Pakhypi) ei 5-na cha Baltimore khihpi Maryland state, United States of America liata tari noh 4-6, Khihpa (July), 2014 heta a râh pôhpalôhpa ta a hmâhna ama hnei haw.

He daiti liata Rev. Dr. Laiu Fachhai chhohkha nata Rev. Dr. Thyhneiza (Thauhneiza, Thawng Hnin Zam) hleikho ta Rev. Sikhaw, he rah liata Ph.D achu haipa chhao ahlaopa ahlao chyu hra ei ta, Amo ama Maryland USA liata apahrapa Marasaw zydua chhao ama tlopha kaw sai, tapa ta thati daopa a cha.

He pakhypi peimawh kawpa noh thoh (3) chhohta aryupa liana heta sâpa nata thlahpa liata Marasawzy chata a peimawh kawpazy reipahmaonazy y taochyupa chata he liata ataopasuana thokhazy nata Mara CHA ataopasuana zy chhao taohrapa ta a cha. He liata Miss Mara (MCC-USA) chata apatlahnazy chhao a y hra tapa ta thati daopa a cha.

2013-2016 chhoh ta center lupazy

MCC USA Chhituhpazy (2013-2016)

1) Chairman: St. Thazama (Indiana State)

2) V-Chairman: St. Meithie (Maryland State)

3) Secretary: Puhpa Ne Ru Zawkhai (Maryland State)

4) Assist. Secretary: Puhpa Valua Chozah (Indiana State)

5)  Finance Secretary: Pupa Ngochho (Georgia State)

6) Treasurer: St. Biesa (Ohio State)

7) Literature and Culture Secretary: Puhpa Khaiko (North Carolina State)

8) Literature and Culture Assist. Secretary: Pihno Sikhei (Michigan State)

9) Education Secretary: Ls. Nunu Fachhai (North Carolina State)

10) Information Secretary: St. Sichho (Indiana State)

11) Information Assist. Secretary: Puhpa Ngothaulai (Georgia State)

12) Sport & Game secretary: Puhpa Maung Khaing (Maryland State)

13) S & G Assist. Secretary: Puhpa Nge Mau(New York State)

Subcategories

  • EAST MARA

    Welcome to Maraland News

  • West Mara

    Magna velit urna Aenean laoreet tellus orci Suspendisse Integer lacus urna. Vivamus mus vitae Integer Nulla turpis tortor mauris montes sem et. Orci convallis vitae mattis Sed Morbi porttitor justo convallis urna feugiat.

  • International Mara News

    Ut leo condimentum Donec felis vitae Nullam et volutpat tortor Cras. Nec ornare id pellentesque adipiscing dui Nam nonummy Vestibulum id quis. Et semper Nam ipsum Sed hendrerit Nunc justo Nulla mus laoreet.

Maraland

Su Yru tawh (Video)

 K.Saidi Su Yru tawhta tahpa hla he Ngochole phipa chata rah hlapi lata atlo hawpa Marasawzy chata la vasah apachhih kaw diah!!! Edited By Saya Khaivatha acha.

MISS H. CAROLINE

MARALAND MISSIONARIES

 The 19th and 20th Centuries witnessedt More detail>>>>>.